Procedura da la surveglianza dal traffic da posta e da telecommunicaziun

En il rom d'ina procedura penala currenta u durant l'execuziun d'ina dumonda d'assistenza giudiziala pon las autoritads chantunalas e federalas da persecuziun penala incumbensar il Servetsch STPT da prender mesiras da surveglianza. Las mesiras vegnan ordinadas da las autoritads da persecuziun penala cumpetentas.

Mintga ordinaziun resp. disposiziun da surveglianza d'ina procura publica sto vegnir suttamessa ad in'examinaziun materiala e vegnir approvada da l'autoritad giudiziala d'approvaziun ch'è cumpetenta en chaussa, vul dir da l'uschenumnada dretgira da mesiras repressivas dals chantuns u da la Confederaziun. Il Servetsch STPT fa la finala anc in'examinaziun formala per controllar, sche l'autoritad ordinanta è effectivamain cumpetenta e sche l'ordinaziun da surveglianza sa referescha ad in delict tenor il catalog da delicts.

Il Servetsch STPT incarichescha silsuenter las furnituras da servetschs da telecommunicaziun da procurar las datas dumandadas e da transmetter quellas al Servetsch STPT. Il Servetsch STPT metta alura a disposiziun las datas a las autoritads da persecuziun penala per las evaluar. Dal cuntegn da las datas e dals detagls da las investigaziuns respectivas na survegn il Servetsch STPT nagina enconuschientscha.

Infurmaziuns simplas

Simplas infurmaziuns elementaras davart attatgs da clients tenor art. 14 al. 1 lit. a–c LSPT. Scleriment a las autoritads da persecuziun penala davart dumondas sco p.ex.: “Da tgi è in tschert numer da telefonin?” ubain “Tge numer è registrà per ina tscherta persuna?”. Per quellas infurmaziuns simplas na valan betg las medemas prescripziuns da procedura sco per controllas. Ellas na ston betg vegnir autorisadas d’in tribunal ed er il catalog da delicts na vegn betg utilisà en quest cas.

Last updated: 12.09.2018 - 14:05